CEBU, Philippines - Gisikop sa kapolisan ang duha ka batan-ong lalaki nga gi-alarmang nag-inom og ilimnong makahubog sulod sa satellite market sa Barangay Canduman, dakbayan sa Mandaue niadtong Domingo sa gabii.
Si PO3 Arnold Villacampo sa Presinto 6 sa Mandaue City Police Office (MCPO) miila sa mga nadakpan nga sila si Jovannie Llave, 18, ug usa ka 17 anyos nga kauban.
Matud ni Villacampo nga gialarma sa ilang buhatan ang mainiton nga panaglalis sa duha ka dinakpan batok sa usa ka tawo sa maong lugar.
Sa ilang pagtubag sa alarma ilang naabtan ang duha nga nag-inom pa og ilimnong makahubog apan nakalakaw na ang lalaki nga ilang gikalalis maoy hinungdan nga ang duha ang gidakop.
Gitataw ni Villacampo nga nakalapas ang duha ka batan-on sa ordinansa sa dakbayan nga nagdili sa pag-inom og ilimnong makahubog nga dayag sa publiko samtang P500 ang multa matag usa kanila. (BANAT NEWS)