Amahan gikulata sa anak

CEBU, Philippines - Nakaangkon og bun-og sa kalawasan ang usa ka amahan human giunay sa pagkulata sa iyang anak.

Si Renato Mahinay, 56, usa ka drayber, ang gikulata sa iyang anak nga si Alexis Mahinay, 19, pulos nagpuyo sa sityo Ban, Magdugo, dakbayan sa Toledo.

Base sa imbestigasyon nasayran nga nadunggan sa amahan nga nagsaba-saba ang iyang anak nga nagmaoy hinungdan nga iya kining gibadlong.

Apan sa iyang pagduol kalit nga gikulata sa iyang anak. Milugnot ang amahan ug daling midagan palayo apan gisuwayan pa kini og labay og bato.

Nangayo og tabang ang amahan sa mga nagpatrolyang mga barangay tanod sa hinungdan sa pagkasikop sa anak.  Gitanggong na sa Toledo City Police Station detention cell ang anak sa biktima. (BANAT NEWS)