CEBU, Philippines - Kritikal ang kahimtang sa usa ka tawo nga misulod sa usa ka birthday party nga nagmaoy hinungdan nga gidunggab sa Purok Shooting Star, Babag, dakbayan sa Lapu-Lapu niadtong Domingo sa gabii.
Ang biktima mao si Jonathan Jimenez Paylangco, 23, minyo ug nagpuyo sa maong dapit.
Sa imbestigasyon ni SPO2 Manolito Abellanosa nasuta nga sa wala pa ang hitabo, si Paylangco nga hubog nang daan misulod sa birthday party ni Zaldy Delantes nga iyang silingan dala ang kutsilyo hinungdan nga nanagan ang mga bisita.
Apan usa sa bisita ni Delantes nga si Dave (apelyedo wala mailhi) wala makaagwanta sa lihok ni Paylangco ug kalit niyang gidunggab sa tiyan.
Gumikan sa kahadlok dali nga misibat si Dave samtang si Paylangco gidali pagdala tambalanan.
Nasuta usab nga dunay kaligotgot ang pamilya ni Paylangco ngadto sa pamilya ni Delantes. (BANAT NEWS)