Mananagat missing

CEBU, Philippines - Pabiling missing ang usa ka 21 anyos nga mananagat sa lungsod sa Badian kinsa giingong gipatay ug gikawat ang makina sa pumpboat.

Ang kapolisan ug mga lokal nga opisyal sa lungsod ang padayung nangita sa patay’ng lawas sa usa ka Raymund Esparaguera, taga Barangay Bato.

Katapusang nakit-an ang biktima pasado alas 5 sa buntag niadtong Sabado nga padulong sa lawod sakay sa iyang pumpboat.

Si Ronald Calabroso, 27, paryente ug silingan ra sa biktima ang gitumbok nga suspek human usa ka drayber sa habal-habal ang mitug-an nga siya ang gipakyaw ug gikargahan sa makina sa pumpboat ni Esparaguera. Daling gisusi sa kapolisan ang panimalay ni Calabroso ug didto nakuha ang makina sa pumpboat ni Esparaguera.

Sa imbestigasyon ni PO2 Bismark Babiera, imbestigador sa Badian Police Station, nasuta nga human gikuha sa suspek ang makina sa pumpboat, iyang gibunalan og bugsay ang biktima dayon nahulog sa dagat ug wala na igkita.

Didto na sa ilawom sa pagatpatan sa Barangay Ginablan napalgan ang sakayan sa biktima nga may lama sa dugo nga gituohan nga iya ni Esparaguera.

Kawat ang nakita sa kapolisan nga motibo sa krimen.Gipahibalo sa kapolisan ang ilang silingang mga lungsod sa pamasin nga adto madagsa sa ilang lugar ang lawas ni Esparaguera. (BANAT NEWS)