Nahulog sa bangka nalumos
CEBU, Philippines - Patay nang naglutaw sa dagat ang usa ka ulitawo human kini nahulog gikan sa gisakyan niyang bangka ug kay di kini makamaong molangoy nalumos kini diha sa Rock Island sa Maribago, dakbayan sa Lapu-Lapu sa milabay’ng hapon.
Ang nalumos mao si Jallim Sugarol Mendez, 17, residente sa Sitio Tinago, Alang-Alang , Mandaue City.
Sa pasiunang imbestigasyon ni SPO1 Allan Pantaleon nasayran nga si Mendez uban sa iyang mga classmates nangaligo sa usa ka resort ug nakahuna-huna nga moabang og usa ka bangka.
Sa dihang anaa na sila sa lawod ug sa kaalegre niini wala nila mabantayi nga nawagtang na si Mendez sa maong sakayan hinungdan nga ila kining gipangita.
Pipila ka gutlo ang milabay kalit nga milutaw ang lawas ni Mendez taliwala sa pundok sa mga tawo nga nangaligo ug sa dihang ila kining suwayan ug dala sa tambalanan patay na kini.
Matud pa ni Pantaleon posibleng nahulog si Mendez nga wala maalingati sa iyang mga kauban. (BANAT NEWS)
- Latest
