CEBU, Philippines - Laing magtutudlo ang gikawatan og sobra sa P150 mil sa Barangay San Vicente, dakbayan sa Bogo.
Nakurat na lang ang biyuda nga si Ma. Nelia Sullera Cenit, 59, sa dihang nagkagubot na ang sulod sa iyang panimalay pag-uli niya alas 5:00 sa hapon sa niaging adlaw.
Nakuha sa mga kawatan ang laptop balor og P22,000; duha ka gold bracelets P40,000; duha ka kwentas nga dunay pendant P50,000; tulo ka mga gold earrings P30,000; ug cash nga P10,000.
Sa pasiunang imbestigasyon sa kapolisan nasayran nga wala si Cenit sa panimalay kay miadto sa buhatan sa Department of Education-Bogo II.
Hapon nang nauli ug mao na lang ang iyang nakit-an nga natangtang na ang kurtina sa bintana sa kwarto sa iyang anak.
Ang tulo ka kwarto sa balay pulos na abli hinugdan nga daling gitan-aw sa biktima ang iyang mga kabtangan ug didto iyang nasuta nga abli na ang iyang cabinet ug ang iyang mga personal nga gamit nagkatag na sa iyang higdaanan.
Matud sa kapolisan nga ang nangawat didto miagi sa bintana sa balay pinaagi sa pagtangtang sa tulo ka mga jalousie blades. Giguba usab ang iron grill sa bintana.
Duda sa kapulisan duha ngadto sa tulo ka mga tawo ang nihimo sa krimen. (/GMR)(BANAT NEWS)