CEBU, Philippines - Ang giingong mastermind sa pork barrel scam nga si Janet Lim Napoles pinaagi sa iyang abogado nga si Atty. Bruce Rivera miangkong nasayop sa iyang paglakip sa pangalan sa bagitong Kongresista sa unang distrito sa probinsiya sa Sugbo nga si Gerald Anthony “Samsam†Gullas, Jr.
Sa initial list ni Napoles nga gisumitir ngadto kang Justice Secretary Leila De Lima nalakip niini ang pangalan ni Gullas.
Si Gullas mikwestiyon niini tungod kay dihang milingkod siya sa katungdanan niadtong Hulyo 1, 2013 gitangtang na ang Priority Development Assistance Fund (PDAF) o pork barrel.
Ang maong pagkasipyat ni Napoles sa iyang listahan dili kini ang unang higayon tungod kay niadtong una gipatangtang usab niya sa iyang listahan ang pangalan ni Senador JV Ejercito.
Si Gullas sa iyang bahin, mipadayag nga nahuwasan kini sa gibati nga kabalaka karon nga giangkon ni Napoles nga nasipyat siya sa pagbutang sa pangalan ni Gullas sa iyang listahan.
Si Gullas mipasalig sa iyang mga konstituwente sa unang distrito sa probinsiya sa Sugbo nga ang maong insidente dili makaapekto sa paghatag niya og matinud-anong serbisyo kutob sa iyang mahimo. (BANAT NEWS)