CEBU, Philippines - Patay ang usa ka 23 anyos nga babaye human giingong naghikog tungod sa selos niadtong Martes sa hapon sa ilang gipuy-an nga apartment sa San Isidro, dakbayan sa Talisay.
Ang naghikog nailhan nga si Nelmie Labrador, dalaga apan dunay kapuyo ug residente sa maong lugar, napalgang wala na’y kinabuhi sa kwarto sa apartment. Sa imbestigasyon sa kapolisan nasayran nga si Labrador nagselos sa laing babayeng gikarelasyon sa iyang kapuyo nga Amerikano.
Sa wala pa mahitabo ang insidente, si Labrador giinging mibahad nga mo-inom og muriatic acid kung ang Amerikano dili mopauli sa oras nga iyang gihatag.
Si Labrador daling gidala sa Talisay City Rescue Emergency Action Team (TREAT) ngadto sa Talisay City Hospital apan wala na’y kinabuhi pag-abot sa tambalanan. Na-recover sa mga polis gikan sa lugar nga nahitaboan ang usa ka basiyo sa botelya nga walay pangan ug usa ka dakung botelya sa muriatic acid. (BANAT NEWS)