Nimartilyo sa ulo sa panday nisurender
CEBU, Philippines - Mitahan sa kapolisan ang 21 anyos nga construction worker kinsa suspek sa pagpatay pinaagi sa pagbunal og martilyo sa ulo sa iyang kauban sa trabaho niadtong Abril 27 sa Mandaue City Central School.
Si Argie Wenceslao Formentera, taga San Isidro, San Francisco, Camotes ang gitumbok nga responsabli sa kamatayon ni Julius Pleños, 26, iyang silingan ug kauban sa trabaho.
Matud ni PO1 Jerome Lendio sa Presinto 1 sa Mandaue City Police Office (MCPO) nga unang mitahan ang suspetsado kang San Isidro barangay kapitan Jesus Mercorsos.
Ang laing silingan nga polis sa lungsod sa Consolacion nga si PO1 Christian Mercorsos nga paryente sa kapitan maoy nagkuha sa suspetsado didto sa maong lugar ug gihatud kagahapon sa buntag sa MCPO.
Si Formentera nag-atubang na og kasong homicide sa korte ug hapit na usa ka buwan nga nagtagotago hangtud nga nakahukom sa pagtahan sa iyang kaugalingon.
Kahinumdoman nga naglingkod lang ang biktima nga nag-atubang sa iyang trabaho dihang kalit lang gihapak sa gibitbit nga martilyo hinungdan sa kamatayon. (BANAT NEWS)
- Latest
