Sa Toledo City: Mga opisina sa gobyerno giputlan kuryente
CEBU, Philippines -Giputlan sa linya sa kuryente ang tanang buhatan sa kagamhanan sa dakbayan sa Toledo kagahapon gawas sa prisohan ug tambalanan.
Kini human wala makabayad sa electric bill nga gibanabanang mokabat sa P1.2 milyones sa Cebu Electric Cooperative III.
Lakip sa giputlan sa kuryente ang Toledo City Hall, Bureau of Fire Protection, Toledo City Police Station, Tourism Office ug ang Travelers Inn nga maoy kasamtangang opisina ni Mayor John Henry “Sonny†Osmeña.
Ang Bureau of Jail Management and Penology ug Toledo City Hospital wala maputli human mihangyo ang mga labaw sa buhatan nga dili una sila putlan sa kabalaka nga mag-riot ang mga piniriso ingon man mapawong ang mga gamit sa hospital nga nagkinahanglan og kuryente.
Atol sa sesyon sa konseho sa siyudad kagahapon, gipasar ang resolusyon ni Konsehal Ricardo Pepito nga naghangyo kang Osmeña nga pabayran ang kuryente sa tanang buhatan.
Gisupak unta ni Kon. Leo Dolino ang resolusyon sanglit walay reenacted budget ang siyudad human gipugngan sa korte ang pagpatuman sa napasar nga 2014 annual budget balor og P619 milyones.
Gani ang kampo ni Osmeña niduso na og petisyon sa Court of Appeals sa paglibkas sa writ of injunction aron magamit ang maong pundo.
Si Kon. Helen Jill Espinosa nanghinaut nga paminawon ni Osmeña ang ilang hangyo aron dili mabalda ang operasyon sa mga buhatan sa gobyerno. (/GMR)(BANAT NEWS)
- Latest
