CEBU, Philippines - Mga kabus nga Talisaynon nga moapil sa libreng mass wedding karong umaabot buwan sa Hulyo niining tuiga pahatagan og libreng Certificate of No Marriage (CENOMAR).
Niadtong milabay’ng semana ang konseho sa dakbayan sa Talisay mipalabang og resolusyon nga nag-awhag sa City Civil Registrar nga ang mga kabus nga moapil sa nahisgutang mass wedding pahatagan og libreng CENOMAR ug linsensiya o permit nga rekisitos sa ilang pagpakasal.
Nasuta sa mga opisyal sa siyudad nga ubay-ubay ang mga illegitimate nga bata karon tungod kay ang mga ginikanan nagpuyo lang nga wala’y kasal.
Ang usa sa rason niini mao ang kalisud sa ilang panginabuhian ug dili makaabot sa paglukat sa mga rekisitos nga gikinahanglan sa pagpakasal.
Ang kagamhanan sa siyudad mihatag og oportunidad sa mga kabus nga makasal aron mahatagan og bendisyon ang ilang pagpuyo ug mahimong lehitimo ang ilang mga anak. (BANAT NEWS)