CEBU, Philippines - Kawatan nga milungkab sa usa ka bodega sa Barangay Alang-Alang, dakbayan sa Mandaue gituohan nga migamit og sakyanan tungod kay bug-at ang mga butang nga iyang gipangawat.
Ang bodega nga gilungkab sa wala pa hiilhi nga kawatan nahimutang sa Sitio Tres Rosas ug gipanag-iya ni Ana Marie Co. Ang mireport sa kapolisan mao ang caretaker nga si Jay Ytang.
Matud ni PO1 Jerome Lendio sa Mandaue City Police Office nga ang nasakiyo sa kawatan naglakip sa air-conditioning unit nga nagkantidad og P60 mil, cable wire nga nagkantidad og P7 mil, usa ka makina nga nagkantidad og P80 mil.
Dugang ni PO1 Lendio nga gisulod sa wala hiilhi’ng kawatan ang maong bodega pinaagi sa paglungkab sa padlock sa pultahan sa mao nga bodega kaniadto’ng Sabado sa hapon.
Si PO1 Lendio miingon nga nagtuo ang kapolisan nga nagdala og sakyanan ang wala hiilhi’ng kawatan nga maoy gikargahan sa mga kinawat kay dili madaog pagpas-an ang mga butang.
Wala’y guwardiya ang bodega mao nga sayon-sayon ra ang kawatan nga milungkab ug wala’y gikahadlokan. (BANAT NEWS)