Duha ka polis gitaktak kay positibo sa shabu

CEBU, Philippines - Gitaktak na sa aktibo’ng serbisyo ang duha ka polis nga nasakpan nga positibo sa kinalit nga drugtest nga gipahigayon kaniadto’ng miaging tuig.

Ang pag-dismiss nila ni PO1 Jose Emmanuel Deluvio ug PO1 Caesar Montañez gipirmahan ni Police Regional Office (PRO)-7 direktor Danilo Constantino sa wala pa kini mobalhin sa Camp Crame.

Ang mga imbestigador sa PRO-7 nakakaplag og igo nga basihanan nga ang duha ka polis nakalapas gayud sa balaod human sila napositibo sa gidili nga matang sa drugas.

Sila si Deluvio ug Montanez pareho nga nadistino sa Cebu Provincial Police Office (CPPO) ug gipasakaan sila’g kaso nga Grave Misconduct tungod sa pagkapositibo sa shabu.

Matud ni Deluvio nga posible nga ang pag-inom niya og tambal nga “antibiotic” tungod kay napaakan siya’g mananap maoy nakaingon nga napositibo siya sa drugtest.

Apan ang mga laboratory experts miingon nga lahi ang resulta sa drugtest kon ang pagkapositibo naggumikan sa paggamit og uban nga matang sa tambal.

Si Montañes usab milantugi kay matud pa ang kamandoan sa Camp Crame nga nagmando pagpahigayon og surprise drugtest wala’y pirma sa dagko’ng opisyal.

Apan ang mga imbestigador miingon nga dili kini makaapekto sa resulta sa drugtest nga si Montañez napositibo sa gidili nga drugas.

Ang balaod naglatid nga ang usa ka polis kinahanglan nga mopasar kanunay sa psychiatric, psychological, drug and physical test nga ipahigayon sa kapolisan. Ang pagpahigayon og random drugtest gitugot sa balaod.

Sa miaging semana, 50 ka polis sa CPPO ang gihimoan unta og surprise drugtest apan 40 ra ang mitunga, ang 10 patubagon ngano nga wala sila makatunga atol sa drugtest.

Wala’y bisan usa sa 40 ka polis nga napositibo sa drugtest. (BANAT NEWS)