CEBU, Philippines - Uwan og init sa tanang adlaw ang gisagubang sa mga drayber og traysikad sa Barangay San Nicolas Proper, dapit sa Taboan Market. Sa plite nga P5 sa matag biyahe sa traysikad, nagkinahanglan kini og igo’ng kusog ug kakugi aron molahutay sa ilang tulomanon matag adlaw.
Dili ikalimod nga daghang nagmaneho og traysikad mga menor de-edad nga napugos lang niini’ng kapoy kaayo nga trabaho tungod sa grabeng kawad-on sa ilang pamilya. Usa na kanila si Joel, 16 anyos nga bisan sa kalinghod pa nga pangedaron, nag-drayb na og sikad.
Gibutyag ni Joel nga dili sayon ang trabaho isip drayber og sikad ilabi na pareho kaniya nga linghod pa ang pangedaron apan wala siya'y mahimo tungod sa kapobre. Gusto siya nga makatabang sa iyang ginikanan nga makasuporta sa inadlaw nila nga panginahanglan.
Kasagaran nga kita sa pagmaneho og sikad kay mokabat lang ngadto sa P200 matag adlaw. Aduna hinoo’y uban nga gihimo lang og kalingawan ang pagmaneho og sikad. Matud ni Joel nga ang uban kanila gastohon lang pagsuyop og shabu.
Apan si Joel nibutyag nga wala siya nisulod sa pagka-adik kay dili siya buot nga madugangan ang problema sa iyang pamilya.
Lain nga drayber og sikad, si Antonio Amarante nga 14 ka tuig na sa mao nga trabaho, miasoy nga gidili g’yud sa mga menor de edad nga momaneho og sikad apan wala kini masumpo sa mga tinugyanan sa balaod.
Matud ni Amarante nga risgo kaayo sa mga motorista ang mga batan-on nga nagmaneho og sikad kay mga kiat ug magpataka lang kini og lusot-lusot, ang uban magduwa diha sa karsada sa ilang sikad.
Ang ubang pasahero mapanagan-on kaayo nga mosakay kun batan-on ang magmaneho sa traysikad kay anaa kanila mapiyal ang ilang kinabuhi samtang magdagan sa karsada.
Mga sakop sa CITOM manakop niadtong mga traysikad nga mopugos pagsulod sa mga karsada nga anaa mag-agian ang mga PUJ nga wala itugot kanila base sa ordinansa sa dakbayan.
Dunay pipila ka drayber og traysikad nga mitug-an nga usahay kun sila madakpan buhian ra sila kun makahatag og kwarta sa mga traffic enforcers nga makadakop kanila. (BANAT NEWS)