Dinakpan midunggab sa polis ug sa iyang kaugalingon

CEBU, Philippines - Usa ka polis ang naangol human nadunggaban sa iyang dinakpan kinsa nag-unay ‘sab og dunggab sa iyang dughan dihang iyaha kining gitangtangan og posas aron unta kini makakaon og pamahaw.

Ang duha nagpaabot og pumpboat nga mobiyahi balik sa Bantayan gikan sa isla sa Hilotongan sa miaging buntag dihang nahitabo ang insidente.

Ang suspetsado naila nga si Seffridel Ribo, 32, molupyo sa isla sa Hilotongan sa lungsod sa Bantayan samtang ang nadunggaban naila nga si PO1 George Gilbuela sa Bantayan Police Station.

Matud pa nga nasikop si Ribo sa sayong buntag sa kapolisan nga pinangulohan ni Senior Inspector Jaime Santillan tungod sa pagsuyop og gituohang shabu.

Nakuhaan kini og usa ka lighter, duha ka tin foil ug usa ka gamay nga pakete nga wala nay sulod ug tulo ka pakete nga may sulod nga gituohang shabu.

Gipakaon pa unta ni Gilbuela ang suspetsado apan dihang gitangtangan na kini og posas gikuha niini ang kutsilyo duol sa iyang gilingkoran dayong dunggab sa tuong kamot sa polis ug pagkahuman nag-unay kini og dunggab sa iyang dughan. Ang duha daling gidala sa tambalanan ug luwas na sila sa makuyaw nga kahimtang. Pasakaan gyud og kaso ang suspetsado sa kalapasan sa Comprehensive Dangerous Drugs Act of 2012 ug sa pagdunggab niini kang Gilbuela.  (BANAT NEWS)