CEBU, Philippines - Ubay-ubay na nga rice retailers sa National Food Authority dinhi sa Sugbo ang gikuhaan og lisensiya sa pagbaligya og NFA rice human masakpi sa mga monitoring team sa NFA-7 nga mibaligya og mahal nga presyo sa bugas.
Ang tigpamaba sa NFA-7 Ma. Lucia Rosales nagkanayon nga P2 hangtod sa P3 ang gipatong sa naasoy nga mga NFA rice retailers sa ilang gibaligya nga NFA rice matag kilo, inay P27 lang unta.
Sigon pa ni Rosales nga nasakpan sa ilang price monitoring team nga ang mao nga mga NFA rice retailers mipahimulos sa higayon nga taas ang presyo sa mga commercial rice pinaagi sa pagpausbaw usab sa kantidad sa NFA rice.
Ang ilang gihimo kalapasan sa gilatid sa accreditation sa NFA nga kinahanglan’g sundon ang gisitar nga prisyo nga P27 lang ang kantidad sa mata’g kilo.
Si Rosales nipahibawo nga base sa kamandoan sa NFA central office, diretso na ang paglangkat sa accreditation sa mga NFA rice retailers nga makahimo og kasaypanan kay higpit nilang gituman ang "one strike policy."
Nagpasabot kini nga bisan makausa lang nakahimo og kalapasan ang rice retailers langkatan dayon kini sa accreditation ug did-an na sa pagbaligya og NFA rice.
Gawas sa pagpasaka sa presyo sa NFA rice, laing gimonitor nga kalapasan sa mga retailers mao ang diversion kon pagtago una sa nakompra’ng NFA rice ug ibaligya lang kini sa mosunod na nga mga adlaw uban sa lahi’ng presyo.
Wala hinuon itug-an ni Rosales ang mga rice retailers nga nakalapas sa lagda sa ilang buhatan.
Dugang ni Rosales nga tumong sa NFA pagsilot sa mga rice retailers nga moabuso mao nga "kaprotehean ang mga konsumedor gikan sa pangabuso sa mga magpapatigayon og bugas. (/RUB)(BANAT NEWS)