Red tide gi-monitor sa BFAR

CEBU, Philippines - Gisugdan na karon pag-monitor sa Bureau of Fisheries and Aquatic Resources (BFAR-7) ang pagtumaw unya sa red tide sa kadagatan nga makaapektar sa mga kinhason. Kini tungod sa nasinati’ng pag-usab-usab sa kahimtang sa panahon nga mokalit lang og ulan taliwala sa tumang kainit sa adlaw.

Si BFAR-7 Regional Director Andres Bojos nipagawas na og kamandoan nga mokuha na og mga sample sa tubig sa dagat dinhi sa Sugbo ug sa uban nga mga lugar sa Central Visayas, ilabi na sa mga lugar nga may kasaysayan nga nakasinati og red tide.

Kini gibase usab sa advisory nga giluwatan sa nasudnong buhatan sa BFAR kaniadtong Mayo 8 subay usab sa nasigpatan nga presensiya sa red tide didto sa kadagatan sa Zamboanga del Sur ug sa Bataan.  Ang gitawag og red tide mao ang matang sa kagaw nga motakboy sagad sa mga kinhason. Ang kinhason, sama sa tahong, maoy sagad matakboyan sa red tide kay mabuka man kini sa dagat.

Gitan-aw pag-ayo karon sa BFAR-7 ang mga gipamaligya’ng kinhason ug isda sa kamerkadohan kun wala ba kini red tide nga posible’ng makahilo sa mga tawo nga makakaon.

Ang ulan maoy makadaghan sa mga enzymes sa dagat nga mahimong red tide kun kini mainitan ug mabugnawan nga mao usab ang sagad kan-on sa mga isda ug mga kinhason.   Si Luzviminda Bato, ang BFAR regional fishery laboratory chemist, niingon nga sa ilang monitoring niadtong Marso namatud-an nga negatibo pa sa red tide ang Central Visayas.

Apan tungod sa nasinating pag-uwan-uwan sa pipila ka bahin sa rehiyon bisan pa sa tumang kainit, hingusgan nila ang pag-monitor sa mga kinhason sa kadagatan ug kadtong gibaligya sa kamerkadohan.

Dugang ni Bato nga posible usab nga motumaw ang fish kill sa mga fish cages sa Visayas tungod sa pagdaghan sa mga organismo gumikan sa kakulang sa oxygen ilawom sa dagat nga maginhawa sa mga isda. (/RUB)(BANAT NEWS)