Armadong Koreano nadakpan sa SWAT
CEBU, Philippines - Usa ka Korean national ang gisikop sa mga sakop sa Special Weapons and Tactics (SWAT) sa Cebu City Police Office, human nga nagdala og revolver nga walay lisensya.
Gitanggong karon sa Mabolo Police Station si Ryan Kim Boseok, 22, lumad nga taga South Korea ug kasamtangan nga nagpuyo sa City Light Condominium, Barangay Busay, Cebu City.
Matud pa ni SPO1 Arnold Aventajado sa Mabolo Police Station nga nahinabi sa Banat News nga ang chief tanod sa Barangay Busay nga si Bryan Cadutdut ang mi-report sa kapulisan may labot sa Koreano nga nagdala og armas diha sa Sitio Maaslom.
Sumala pa nga iyang nalabyan si Boseok kauban ang iyang uyab nga Filipino nga si Cris Escribe nga nag- away kilid sa karsada ug nakit-an niya kini nga giliab ang maong babaye.
Tungod niini miinterbinir siya apan gipakitaan hinoon siya niini sa dala nga revolver, mao nga miatras si Cadutdot ug dali nga mitawag og polis.
Pag-abot sa SWAT pinangulohan nila ni SPO3 Leovel Singson ug SPO3 Cliff Edisa miaksyon og sibat ang suspek apan naapsan siya ug napahunong ang sakyanan niini. Atol sa pakisusi nga gihimo nakuha sa operatiba ang snub nose .38 revolver nga may 12 ka mga bala, apan wala kini napakitang dukumento.
Ang maong langyaw gitanggong karon sa Mabolo Police Station ug napasakaan og kaso kagahapon tungod sa kalapasan R.A 10591, paghupot og ilegal nga armas. (/EIM)(BANAT NEWS)
- Latest
