Nurse sa Maternity hospital mi-deny nga iyang giplasteran ang masuso

CEBU, Philippines - Naghilak nga milimod ang nurse kinsa gituohang maoy mi-plaster sa baba sa masuso diha sa Cebu Puericulture Center and Maternity House, Inc. (CPCMHI) atol sa pag-atubang niini kagahapon sa inter-agency conference bahin sa maong reklamo kagahapon.

Si Arianne Pacula usa ka registered nurse, masulob-on nga mihimakak sa pasangil sa inahan sa masuso nga naabtan niini ang iyang anak nga may plaster sa baba, wa say oxygen hose o bisan unsang ekipo nga nakatapot niini aron dunay rason nga gikabitan kini og plaster.

Matud pa dihang gipangutana sa inahan si Pacula bahin sa plaster, giingong gitubag siya niini nga tungod kini sa kasaba sa hilak sa iyang anak. Apan gihimakak kini ni Pacula kay wa siya’y nakit-ang plaster o pacifier sa masuso.

Dihang gipangutana si Pacula bahin sa plaster nangagpas lang siya sa pagtubag nga basin tungod sa pacifier. Gikwestyon ni Konsehal Gerardo Carillo kun ‘practice’ na ba sa ospital ang pag-plaster sa baba sa bata kun magbutang og pacifier. Matud ni Pacula, dili gyod sila mogamit og pacifier kun way mando sa mga doktor ug dili usab kinahanglan ang plaster niini.

Matud ni Pacula, nasurpresa siya dihang nakita niya ang pacifier ug plaster sa crib sa bata kay ginadili man  kini sa maong hospital.  Gani, nakita pa niya ang inahan nga nakapatotoy sa anak nga wala ang plaster ug ang pacifier. Gihimakak usab niya nga mitabang siya pagtangtang sa plaster. Giangkon niyang nakalimot siya pag-report sa iyang labaw sa  maong insidente kay wa ra man maunsa ang bata. Karong adlaw nga Martes giawhag ang duha ka habig pagtambong sa  nagpadayong imbestigasyon. (/EIM) (BANAT NEWS)