Inquiry sa TCC gitinguha ni Samsam

CEBU, Philippines - Nagtinguha si Kong. Gerald Anthony “Samsam” Gullas, Jr. sa unang distrito sa probinsiya sa Sugbo nga maimbestigar sa Kongreso ang kasamok sa Talisay City College gumikan sa duha ka presidenti.

Si Gullas miduso og House Resolution No. 1117 tumong sa pagpahigayon og Congressional Inquiry tali sa duha ka pangulo sa TCC nga sila si Richel Bacaltos ug Dr. Paulus Mariae Cañete.

Si Bacaltos gipili kini sa Board of Trustees (BOT) nga maoy molingkod nga presidente sa TCC samtang si Cañete  maoy gitudlo ni Talisay City Mayor Johnny De los Reyes nga mopuli kang Bacatos.

Si Gullas miinsister nga ang mayor mitudlo kang Cañete nga walay pagtugot sa BOT ug matud niya nga ang BOT lang ang makatudlo og presidente sa TCC. Niadtong Marso 20, 2014 ang BOT mikompirma sa status ni Bacaltos isip acting president sa tunghaan ug siya usab ang gitugotan nga mo-confer sa degrees, diploma ug title sa 2014 graduates sa TCC. Matud ni Gullas nga misamot ang kalibog karon sa mga ginikanan ug estudyante sa TCC tungod kay duha ang gipahigayong enrollment.

Si Cañete nagpahigayon kini og enrollment diha sa entrance sa tunghaan samtang si Bacaltos naa magpahigayon og enrollment sa 2nd floor sa building sa tunghaan. (BANAT NEWS)