CEBU, Philippines - Gitanggong sa Station 2 sa Cebu City Police Office ang duha ka representante sa travel agency nga gikiha og estafa human niuntol ang tseke nga gibayad ngadto sa usa ka dakung hotel sa dakbayan sa Sugbo.
Ang gisikop sa kapolisan mao sila si Garry Gesmundo ug Mary Ann Malijan, representante sa New Port Asia International kinsa maoy nagpatigayon sa 540 ka kapitan sa dakbayan sa Laguna nga nihimo og Lakbay Aral sa dakbayan sa Sugbo niadtong Mayo 19. Gipangita usab sa kapolisan ang labaw nga opisyal sa maong ahensiya nga si Elma Lantin. Reklamo sa tagdumala sa Crown Regency nga dunay bayronon ang maong agency nga moabot sa P1.9 milyones sa lima ka gabii nga pagpuyo sa mga kapitan apil na ang ilang kaon ug snacks.
Dihang gipa-encash sa taga hotel ang tseke nga gi-isyu sa travel agency, miuntol kini tungod kay walay sulod.
Matud ni Police C/Insp. Wildemar Tiu, hepe sa CCPO Station 2 nga nahinabi sa Banat News nga sa iyang inisyal nga pagsusi sa Department of Tourism walay lisensya ang maong travel agency nga mohimo sa maong trabaho.
Nunot niini, gipanawagan ni Tiu ang mga hotels sa Sugbo nga magmabinantayon sa mga transaksyon nga ilang sudlan ug segurohon gyud nila nga lehitimo ang agency nga ilang ikatransaksiyon. (BANAT NEWS)