Tulo nakuhaa’g mga armas ug shabu

CEBU, Philippines - Tulo ka tawo ang nadakpan ug nakuhaan og mga armas ug shabu sa gihimong buy-bust operation sa mga sakop sa Provincial Anti-Illegal Drugs Special Task Group (PAIDSOTG) kagahapon sa buntag sa Barangay Upper Cansaga, Consolacion.

Ang nangadakpan mao sila si Fredie “Maton” Puesca, 36, Junrey Bereminito, 29, ug Ermond Celocia, 24, taga Cebu City ug Mandaue City.

Nakuha gikan kanila ang tulo ka mga .45 nga kalibre pistola nga adunay tulo ka magazines ug mga 20 ka bala sa maong kalibre, usa ka .22 revolver, usa ka gamay ug duha ka mga medium nga pakete sa shabu, duha ka mga marijuana sticks, P500 marked money, ug usa ka Honda Wagon motorcycle (JEC 137).

Matud ni SPO4 Jaime Otadoy,  gipalitan nila og balor P500 nga shabu ang mga suspek ug dihang gitunol kini gidiretso sila og dakop.  Si Puesca wala hinuon moangkon nga iyaha ang mga shabu gawas lang sa armas nga matud niya  pang self-defense, napriso na kini og 13 ka tuig sa New Bilibid Prison sa Muntinlupa City ug  pito pa lang ka buwan sukad kini nakagawas.

Samtang si Celocia  nag-eskuyla kaniadto pagka-polis apan tungod sa kawad-on naundang kini.  (BANAT NEWS)