CEBU, Philippines - Nakuha sa The Freeman Newspaper ang Regional Newspaper of the Year sa prestihiyosong Rotary Club of Manila Journalism Awards.
Ang The Freeman,igsuong pamantalaan sa Banat News magsaulog sa ika-95th nga anibersaryo niini karong bulan sa Hulyo ug maoy ikaduha nga labing karaan ug kasaligang pamantalaang gipatik sa pinulongang Englis dinhi sa nasud.
Sakop ang The Freeman sa The Philippine Star Group of Publications. Ang lead newspaper sa Star Group nga The Philippine Star gihatagan usab sa RCM Hall of Fame award.
Sa miaging tuig, ang Philippine Star maoy nahimong labing unang pamantalaan nga nahimong RCM Hall of Fame human nakuha niini ang National Newspaper of the Year award sud sa tulo ka higayon.
Nakadawat usab og special award ang kolumnista sa Philippine Star nga si Ernie Maceda.
Ang Editor-in Chief sa The Freeman ug Banat News nga si Quennie Bronce maoy personal nga midawat sa award diha sa New World Makati Hotel sa Manila.
Ang Presidente sa Star Group nga si Miguel Belmonte midayeg sa The Freeman staff atol sa pagduaw niini sa miaging semana ug giawhag sila nga ipadayon ang motto sa pamantalaan nga “the fair and fearless†nga pamantalaan sa rehiyon.
Sumala pa sa website sa RCM, ang Journalism Awards, usa ka prestihiyosong kalihokan nga giila sa tanang rotary organizations sa tibuok kalibotan, nagsugod kini niadtong tuig 1966.
Tumong niini nga pasidunggan ug ilhon ang kontribusyon sa mga miyembro sa tri-media: print, television ug radio aron mas maninguha pa kini sa pagpalambo sa Philippine Journalism. (BANAT NEWS)