CEBU, Philippines - Apektado ang buhatan sa Bureau of Fire and Protection (BFP) sa dakbayan sa Toledo tungod kay hangtud karon wala gihapo’y budget ang siyudad.
Matud ni SFO2 Julius Dagatan sa BFP Toledo nga naapektohan ang operasyon sa ilang buhatan ilabi na kun adunay motumaw nga sunog sa dakbayan.
Nasayran nga guba ang usa sa mga fire truck sa dakbayan diin wala pa kini mapaayo hangtud karon tungod kay wala’y pundo.
Dugang ni Dagatan nga gawas sa guba nga fire truck nagkulang usab og mga ekipo ang kabombero sa siyudad.
Ang BFP Toledo adunay lima ka fire truck diin lakip niini ang anaa sa ilang sub-station nga nahimutang sa barangay Don Andres Soriano (DAS) sa Lotupan.
Gawas sa mga ekipo naproblema usab ang BFP Toledo sa kakuwang sa ilang personnel tungod kay ubay-ubay ang gikatakdang moretiro na sa katungdanan. (BANAT NEWS)