CEBU, Philippines - Grabeng pagkaangol sa upat ka tawo dihang kalit nga nagkasungag ang giluwanang motorsiklo sa Barangay Sta. Rosa, dakbayan sa Danao alas 4 pasado sa hapon niadtong Martes.
Si SPO1 Reynante Manulat, imbestigador sa traffic section sa Danao City Police Station miila sa mga naangol nga sila si Joseph Montes Batucan, 29; taga Capotatan, Ginacot, dakbayan sa Danao nga maoy nagdala sa Yamaha nga motorsiklo. Naangol usab ang 15 anyos nga lalaki nga si Arnel Camaungay Labrador nga taga Cabulihan, Balingag, dakbayan sa Danao nga maoy nagdala sa Honda nga motorsiklo nga gikasungag sa motorsiklo ni Batucan.
Dugang naangol mao ang inahan ug anak nga nag-angkas sa motorsiklo ni Labrador nga sila si Zeny Cane Labador, 14 ug Rosalina Cane Labador, 55, taga Sitio Camansi, Togonon sa maong dakbayan.
Matud ni Manulat nga padulong sa Poblacion ang motorsiklo nga giluwanan ni Batucan ug padulong pauli ang motorsiklo nga gidala ni Labrador gikan sa Poblacion sa maong dakbayan.
Sa ilang paghidangat sa maong lugar maoy ilang nalabyan ang nag-parking nga multicab nga maoy hinungdan nga nag-iyahay sila og likay sa pikas habig sa dalan nga nakaingon sa ilang panagsungag.
Si Manulat miingon nga gumikan sa kusog nga impact sa maong panagsungag nalamba ang ilang giluwanan nga motorsiklo ug nangalagpot ang mga biktima nga nagsakay nga nakaingon sa ilang pagkaangol.
Gidala ang mga biktima ngadto sa Danao District Hospital apan sa grabeng kahimtang sa mga biktima, dali kining gibalhin sa Vicente Sotto Memorial Medical Center sa dakbayan sa Sugbo. (BANAT NEWS)