Libreng parking tulo ka oras sa mga seniors, PWDs

CEBU, Philippines - Libre na ang parking sa sakyanan sa mga senior citizens ug persons with disabilities (PWD) sulod sa tulo ka oras sa mga pribado ug pangpublikong pay parking areas sa dakbayan sa Sugbo. Kini human aprobahi sa konseho sa dakbayan sa Sugbo ang pag-usab sa City Ordinance 2326 nga giduso nilang Konsehal Alvin Dizon ug Lea Japson. Ang nahiunang ordinansa matud ni Dizon dili klaro nga apil ang mga public parking facilities maong ilang giduso nga maapil kini sa probisyon.

Ubos sa giusab nga ordinansa, bisan pasahero lang ang usa ka senior citizen ug PWD, makaapil gihapon sila sa maong pribilehiyo basta ipakita lang ang ilang I.D. card.

Kadtong magpakaaron-ingnon nga senior citizen ug  PWD makamulta og P5 mil.

Matud ni Dizon makakwarta gihapon ang usa ka pay parking nga lugar tungod kay dunay bayad basta molapas na ang tulo ka oras nga parking sa sakyanan.

Lakip sa makapahimulos sa maong pribilehiyo ang taga laing dapit lakip na sa mga langyaw basta makapakita sa ilang ID card ug pasaporte.

“Para nako, we should be proud nga we have this ordinance because we are the first city in the entire country that adopt such ordinance, giving parking privileges to senior citizens and PWD,” matud ni Dizon.

Ang mga cashiers, booth attendants ug mga parking aids nga dili makapatuman sa maong ordinansa, pribado man o publiko, adunay atubangon nga silot. (BANAT NEWS)