MICS makig-dialogue sa mga opisyal sa Talisay

CEBU, Philippines - Ang mga sakop sa Media in Cebu South (MICS) buot makigdiyalogo sa mga opisyal sa dakbayan sa Talisay aron mapadayag ang ilang gimbuhaton isip mga tigbalita.

Pipila sa ilang mga sakop giingong gipasanginlan nga may gilabanan ilabi na sa nagka-aslum nga relasyon tali ni Mayor Johnny De los Reyes ug Bise Mayor Romeo Villarante kinsa kauban sa partido.

Kagahapon ang MICS pinangulohan ni Justin Vestil nagtigum ug mituki sa mga isyu nga naglambigit sa grupo ug miawhag sa mga opisyal sa siyudad nga makigdiyalogo.

Usa sa tumong ang pagkuha sa sentimento sa mga opisyal kabahin sa isyu sa pagbalita.

Gustong pakig-estoryahan sa grupo sila si Mayor delos Reyes ingon man ang anak nga si John Yre kinsa maoy City Administrator.

Subay niini si Vestil nipadayag usab sa iyang kasagmuyo sanglit gawas nga pasanginlan sila nga bias, may pasangil usab nga sila ang nagpasabong sa habig sa mayor ug bise mayor aron magkaaway.

Gipasabot ni Vestil nga ang pagkuha sa matag habig dili buot nga paawayon ang duha apan maoy angay buhaton sa usa ka tigbalita nga makuha ang duha ka habig.

Si Talisay City Public Information Officer Vince Monterde nga nitambong sa tigum sa MICS kagahapon ang gihangyo sa grupo nga maoy mopaabot sa mensahe ngadto sa mga opisyal sa siyudad kabahin sa diyalogo. (BANAT NEWS)