CEBU, Philippines - Giluba sa lusong-lusong, gigapos, giputos ug habol og plastic dayon gipugos og sud sa usa ka maleta nga gibaatan og alambre, mao kini ang kahimtang sa usa ka wala mailhing lalaki nga gituohang biktima sa pag-salvage nga napalgan sa kalibonan sa Sitio Maomawan, Barangay Babag II ning dakbayan sa Sugbo kagahapon.
Ang maong wala mailhing tawo gituohan ni PO3 Leroy Baguio ang imbestigador sa Homicide Section sa Cebu City Police Office nga gipatay gikan sa laing lugar ug anha lang kini gilabay sa maong dapit.
Walay nakaila sa maong patay nga lawas sa maong lugar ug wala sa’y nakuha nga bisan unsa nga ID sa lawas niini aron unta kini mailhan.
Gibanabanang anaa sa 40- anyos pataas ang pangidaron sa biktima nga nagsuot og itom nga shorts, 5’7 ang gitas-on , pution og pamanit ug wala na’y sapot sa taas nga bahin sa iyang lawas.
Usa ka Fedelina Reyes, 74, nagpuyo sa maong lugar nga gikan nangumpay og pagkaon sa iyang baka maoy nakakaplag sa maleta nga gilibotan na og langaw tungod sa kabaho.
Dali niyang gipahibalo ang barangay hall ug sa ilang pagsusi, una nilang gidudahan nga patay nga hayop ang sud sa maleta, apan nakurat sila sa pag-abli niini nga tawo diay nga giputos og maayo ug gipatikuko ang sulod niini.
Nakuha usab gikan sa bulsa niini ang lima ka gidudahang paketeng shabu ug tulo ka tin foils. Gidudahang pipila na ka adlaw kini sa maong dapit tungod kay nagsugod na kini og kadugta.
Ang patay’ng lawas naa karon gibutang sa Surelife Funeral Homes sa N. Bacalso Avenue, Cebu City samtang gipaabot pa ang mga kabanay nga posibleng mo-claim niini. (BANAT NEWS)