Dalan kilid sa Basilica pasirad-an pagbalik

CEBU, Philippines - Nihangyo na usab ang kadagkoan sa Basilica Minore del Sto. Niño sa kagamhanan sa dakbayan sa Sugbo sa pagpasirado pagbalik sa bahin sa Osmeña Boulevard samtang gihingpit ang pag-ayo sa bagtinganan sa simbahan.

Napupos na ang pagtugot gikan sa dakbayan alang sa temporaryong pagsirado sa dalan atubangan sa simbahan sa niaging buwan hinungdan nga ang nagdumala sa maong heritage site subling nangayo og laing pagtugot.

Ang Agustinong pari nga nagdumala sa pagpaayo sa naguba nga bagtingan sa Basilica, Fr. Harold Rentoria, mibutyag nga nakapadala na sila og  suwat ngadto sa City Traffic Operations Management Office (CITOM).

Matud ni Rentoria nga mas taas nga panahon ang ila unyang pangayoon kung magsugod na ang restoration proper sa bagtingan nga nahagsa dungan sa pagtay-og sa magnitude 7.2 nga linog niadtong Oktubre 15.

Ang maong dalan gisirad-an na atol sa Semana Santa hangtud sa pagtimaan sa Kaplag kon ang pagkakita sa imahen sa Balaang Bata niadtong panahon sa Kastila diin nagsugod ang pagtoong Katoliko dinhi sa nasud human gitugtan sa CITOM.

Matud ni Rentoria, gihangop sa katawhan ang maong pagsirado tungod kay nahibaw-an nga daghan ang didto nag Estasyon sa Krus niadtong mahal nga adlaw.  Si Bise Mayor Edgardo Labella kinsa miduso sa "Pedestrianization" ordinance sa maong karsada aron ma-preserve ang maong heritage site mipadayag sa kalipay alang sa positibo nga paghangop sa katawhan ilabi na sa religious groups. Apan iya usab gidugang nga angay pa kining tun-an ilabi na sa kabalaka sa CITOM kabahin sa trapiko. (/GMR)(BANAT NEWS)