CEBU, Philippines - Ang gideklarar sa hukmanan nga maoy tinuoray’ng midaog pagka kapitan sa Barangay Sambag 1, dakbayan sa Sugbo atol sa miagi’ng eleksyon miawhag na sa korte nga moluwat og kamandoan nga mopalingkod na kaniya sa katungdanan. Si Ma. Aileen Guardo miduso na og Motion for Execution Pending Appeal didto sa korte human nga ang iyang kaatbang nga si Kapitan Lemar Alcover miapelar sa desisyon sa hukmanan nga nagdeklarar nga labaw si Guardo og 73 botos kay kang Alcover.
Human g’yud sa eleksyon sa barangay kaniadtong Oktobre, si Alcover maoy gideklarar nga mananaog apan diha’ng giihap pag-usab ang mga balota didto sa hukmanan base sa awhag ni Guardo, nabiyaan na si Alcover og mga botos. Karong Biyernes gikatakda nga ipahigayon na ang hearing sa Motion for Execution ni Guardo.
Hinuon si Barangay Kapitan Lemar Alcover pa gihapon ang kapitan sa Barangay Sambag 1 hangtod nga momando ang huwes nga mopabor sa giawhag ni Guardo.
Samtang si Felomino Chuntic giingon nga ilegal nga gipapahawa pagka treasurer sa Sambag 1 bisan pa og wala siya makahimo og salaod ubos sa pagdumala ni Alcover.
Tungod niini gikataho nga daghan ang mga transaksyon sa barangay nga na-pending sama sa mga bayronon, mga vouchers ug ang mga sweldohan sa mga kawani sa barangay.
Gikabalak-an nga maapektohan ang sweldo sa mga 100 ka kawani sa barangay karong katapusan sa buwan tungod kay wala pa’y treasurer nga nailis ni Chuntic.
Samtang si Guardo nagplano nga ipadayon niya ang proyekto sa iyang bana nga maoy kanhi barangay kapitan sa Sambag 1 sama sa paglimpyo sa ilang drainage, pag-aspalto sa mga agianan kun molingkod na siya isip kapitan sa Sambag 1. (/RUB)(BANAT NEWS)