US Navy Seabels magtukod og eskuylahan

CEBU, Philippines -  Kasamtangang mo-estar sa Regional Public Safety Battalion 7 sa Bahay, Sibonga ang 21 ka mga US Navy personnel samtang nagtukod pa sila og usa ka building nga may duha ka lawak-saringan sa dakbayan sa Carcar.

Kagahapon sa buntag, pormal nga gipirmahan sa RPSB-7 ug sa US Navy ang memorandum of understanding (MOU) nga nagtugot sa mga sundalong Amerkano nga temporaryong mopuyo sa kampo sa mga polis ngadto sa Sibonga. Ang maong kasabotan gipirmahan sa Battalion Commander sa RPSB7 nga si Supt. Clifford Gairanod ug ni US Navy Commander Joe Harder sa US Navy 30th Construction Regiment. Matud pa sa usa ka dokumento nga nakuha sa Banat News nga ang maong planong pagtukod sa two-classroom building sa sitio Tal-ot, Barangay Valencia sa dakbayan sa Carcar nga mahuman karong Agosto 15.

Ang maong proyekto gipasiugdahan sa Joint United States Military Assistance to the Republic of the Philippines (JUSMAG-PHIL). (BANAT NEWS)