CEBU, Philippines - Nakigsawo ug nagkinamot nga namahaw si Bise Presidente Jejomar Binay uban sa 100 ka manindahay sa merkado publiko sa Sitio Tribunal, Barangay Centro, dakbayan sa Mandaue sa iyang pagbisita niini kagahapon sa buntag pinaagi sa boodle fight nga gipahigayon.
Ang mga opisyal sa kagamhanan sa dakbayan sa Mandaue nga gipangulohan ni Mayor Jonas Cortes, Bise Mayor Glenn Bercede ug mga konsehal maoy gikauban ni Binay sa maong pagpangaon.
Daklit lang ang pagbisita ni Binay sa merkado sanglit ang pagpinirmahay sa Memorandum of Understanding (MOU) sa Social Housing Finance Corporation (SHFC) ug sa maong dakbayan man maoy iyang tuyo dinhi isip chairman sa Housing Urban Development and Coordinating Council (HUDCC) sa nasudnong kagamhanan.
Kauban sa panon ni Binay ang mga representante sa World Bank, walo ka mga opisyal sa Malabon, Valenzuela, Parañaque, Muntinlupa, Marikina, Quezon ug Davao.
Si Tonyfet Juanico nga maoy pangulo sa Housing on Urban Development Office (HUDO) sa dakbayan miingon nga gustong makita sa mga kauban ni Binay ang malampusong housing program sa Mandaue sa Barangay Canduman, Barangay Tipolo ug ang 6.5 ektaryang relocation site sa Barangay Paknaan. (/EIM)(BANAT NEWS)