CEBU, Philippines - Naluwas sa Toledo City Environment and Natural Resources Office ang usa ka endangered specie nga green sea turtle human nakaangkon kini og samad dihang napadpad sa baybayon sa sityo Looc, Barangay Bato, dakbayan sa Toledo.
Pipila ka mananagat ang nakakita sa maong pawikan nga na-trap sa dakong bato nga nagluya ug nasuta nga adunay samad hinungdan nga daling nangayo og tabang sa CENRO ug sa Department of Environment and Natural Resources.
Nasuta sa CENRO ug DENR nga adunay upat ka samad pinusilan ang maong pawikan.
Daling gitambalan ang samad sa maong pawikan ug gibuhian ra pagbalik sa dagat sa mga tinugyanan sa CENRO.
Gibana-banang may gitas-on nga duha ngadto sa tulo ka tiil ang maong pawikan.
Ang green sea turtle usa ka endangered specie tungod sa pagpanakop niini diin himoong karne ang unod, ang uban nangamatay sa pagkaigo sa palabad sa barko ingon man gipanguha ang itlog niini. (BANAT NEWS)