Carillo andam motabang sa amahan sa gitaptapan

CEBU, Philippines - Andam ang dakbayan sa Sugbo pinaagi sa City Legal Counsel sa paghatag og legal assistance kang Ryan Noval ang secretary general sa Sugbo Bikers ug amahan sa masuso nga gitaptapan ang baba sulod sa usa ka ospital tungod kay sige og hilak.

Si Konsehal Gerardo Carillo miingon andam siya sa pag-abag niini sanglit usa man siya ka abogado, hinuon di mamugos si Carillo kung di gusto ni Noval nga tabangan.

Samtang gusto ni Carillo nga adunay ordinansa ang dakbayan sa Sugbo kalabot sa katungod sa mga pasyente sa mga ospital ug ang maayong pag-atiman kanila sanglit kinahanglan kaayo nila ang maayong pag-atiman sa sulod niini.

Ang bag-o lang nahitabo nga pagtaptap sa baba sa anak ni Noval dili usa ka isolated case matud pa ni Carillo. Gihimo niyang sanglitanan ang insidente kaniadto nga “Black Suede” sa Vicente Sotto Memorial Medical Center nga sekretong gikuhaan og video samtang gioperahan ang usa ka pasyente,  duna say bata nga namatay tungod sa dengue kay gipainom lang og aspirin para sa hilanat ug ang pag-detain sa mga dili kabayad sa bayrunon sa ospital.

Giawhag karon ni Carillo ang Committee on Health ug Committee on Laws nga magmugna og ordinansa aron malikayan nga mahitabo pag-usab ang mga ingon ani nga mga malpractice sa medical professionals ngadto sa mga pasyente.  (BANAT NEWS)