CEBU, Philippines - Hepe sa kapulisan sa Medellin miangkon nga nakadawat siya og text messages gikan sa usa ka unregistered number nga midemanda kaniya og P2 million bugti sa 17- anyos nga suspek kinsa matud pa mieskapo gikan sa Medellin Police Station adtong Abril.
Si Chief Insp. Fructuoso Lim mibutyag nga ang maong tawo mi-text kaniya pipila ka adlaw human mieskapo ang maong batan-ong taga Barangay Kawit. Matud pa mi-demanda kini og kuwarta kung gusto niya nga malimpyo ang iyang ngalan.
“Ingon nga kung gusto ka makuha nimo si Jessie mangayo siya og P2M pero akong giingnan nga wa pa ko maboang asa gud taw’n ko anang P2M?†matud ni Lim.
Apan tungod kay dili makahatag si Lim sa maong kantidad, gi-offeran kini og P200,000 sa texter isip initial payment. Gaduda si Lim nga posibleng modus operandi ang maong lihok batok kaniya, gisuwayan sa hepe sa pagtawag ang numero apan dili na kini makontak.
“Ambot basin gisakyan lang pud ni daghan og possibilities pero di pa gyud ko kasiguro,†matud niya. Katapusang semana sa Abril sa dihang gasugod sa pag-text ang maong tawo nga gipahibalo dayun ni Lim sa ginikanan sa suspek apan matud niya nga mura lang kuno kini og wala kanila.
Ang maong suspek adunay kasong robbery with frustrated homicide. Ang maong eskapo miikyas agi sa bintana sa Women’s and Children’s Protection Desk sa police station samtang nag-prepara ang pulis sa release order niini. Apan ang ginikanan sa batan-on midangop sa Office of the Ombudsman-Visayas ug mireklamo batok kang Lim ug gipasangil nga gisugo niini og sigarilyo ilang anak maong nakaeskapo kini. (BANAT NEWS)