CEBU, Philippines - Bag-ong gipanganak nga masuso nga babaye napalgan sa kasagbotan nga bahin sa Sitio Pangitan Barangay Inayagan dakbayan sa Naga niadtong Mayo 12 pasado alas-6 sa buntag.
Matud pa ni PO2 Maria Genevieve Agcol sa Naga Police Station nga usa ka Mylene Villarmea, residente sa nahisgutang dapit maoy nakakita sa maong bata nga giputos lang og lampin.
Giingon nga samtang naglakaw si Villarmea, ang kusog nga hilak sa bata ang nakahatag og pagtagad niini ug dali gilayon nga iyang gisubay ang lugar kung asa kini naggikan.
Dali nga giduol ni Villarmea ang maong lugar ug iyang nakita ang usa bata nga bag-o pa lang gipanganak, nga igo lang giputos og lampin nga duna pay daghang mga sagbot nga namilit sa iyang lawas.
Dali kini niyang gikuha ug daling gi- turnover ni Villarmea sa Department of Social Welfare and Development (DSWD). Sa pakighinabi sa Banat News ni Betty Ababan ang social worker sa DSWD Naga City, nga ila nang gisulayan og duol ang mga barangay officials sa Barangay Inayagan aron masubay kung duna ba’y mga bag-ong nanganak apan nag negatibo ang report.
“Remote area gyud nang lugara sir, wala gyud kaayo tawo moagi diha, gi-try na namo og locate sa mga silingan nga barangay, negative gyud gihapon, siguro basin dili to taga diha ang inahan,†matud pa ni Betty Ababan.
Nagtinabangay na karon ang kapulisan sa Naga ug ang mga personahe sa DSWD sa pagpangita sa inahan sa bata aron kini patubagon sa iyang gibuhat. (BANAT NEWS)