CEBU, Philippines - Wala mahadlok ang pamilyang Archival sa mga pagpanghadlok nga text messages nga ilang nadawat may kalabutan sa pagbanhig-patay kang Atty. Noel Archival.
Matud ni Talamban barangay konsehal Nelson Archival, igsoon sa biktima, nga kung mahadlok sila magpasabot kini nga mohuyang ang ilang kaso.
“Ipamahaw, paniudto ug ipanihapon na lang namo…sometimes kanang message nga wala ma-register dili na lang nako basahon pero naay usahay nga maablihan gyud nako nga dili matuyo,†matud ni Nelson.
Matud niya nga wala na lang nila ipa-blotter ang maong mga pagpanghulga kay posibleng makasamot lang kini sa sitwasyon apan gipahibawo na nila ang National Bureau of Investigation kabahin niini.
Sa usa sa mga text messages nga nadawat ni Nelson nagpasabot kini nga buhian ang kaso batok sa ilang kontra apan wala kini panumbalinga sa konsehal.
“Di nako pwede buhian kay we know kinsa na sila pero alkansi ta pirmi kay we need to follow due process kay kung gusto lang ta ug ingon ana pastilan daghan nami nadawat nga ni-offer pero wala lang mi kay wala nay kahumanan ang ingon ana,†matud ni Nelson.
Daan nang nakadawat og mga pagpanghulga ang banay’ng Archival bisan pa man kung wala pa malubong ang abogadong gipatay.
Sa imbestigasyon sa Special Investigation Task Group ug NBI, mga opisyal sa Regional Highway Patrol Unit-7 nga sila si Sr. Supt. Romualdo Iglesia, Chief Insp. Eduardo Mara, Sr. Insp. Joselito Lerion, ug SPO4 Edwin Galan ang napasakaan na og kasong multiple murder. (BANAT NEWS)