CEBU, Philippines - Patay ang usa ka gipasanginlang nalakip sa drug watchlist sa lungsod sa San Fernando human girakrakan sa mga armadong kalalakin-an ang ilang balay diha sa Sitio Pajo, Barangay Pitalo sa maong lungsod.
Patay dihadiha si Geraldo Basalo, 45, samtang naluwas ang iyang kapuyo nga si Charito Alquisola ug ang ilang katorse anyos nga anak nga lalaki.
Base sa imbestigasyon sa San Fernando Police Station, gitug-an ni PO1 Lauro Laurel nga ang biktima naila nga usa sa mga nagpayuhot og drugas sa maong lugar. ng mga silingan sa namatay mibutyag nga nangatulog na ang mga biktima dihang ilang nabantayan ang unom ka wa mailhing mga lalaki nga pulos armado og tag-as nga kalibre sa armas.
Sumala pa nga gisampit pa sa mga armado ang pangalan sa biktima apan wala motubag ang naulahi. Dihadiha nadungog nila ang butobuto sa armas.
Matud pa sa impormasyong nadawat sa kapolisan, nakahimo pa pagbawos pagpusil ang biktima makausa ka higayon gamit ang usa ka kalibre .45 nga pistol apan tungod sa kadaghan sa mirapido sa ilang balay naigo gyud kini sa hawak ug tiil nga maoy nahimong hinungdan sa hinanali niyang kamatayon.
Ang balay sa biktima ginama sa kongkreto apan nabulit gyud kini sa mga buslot inagian sa bala.
Ang kapuyo ni Basalo si Alquisola miingon nga nakadawat og mga hulga pinaagi sa text message ang biktima gikan sa wala mailhing tawo sa wala pa ang pagpangrakrak.
Matud pa ni PO1 Laurel, duna nay record sa ilang buhatan si Basalo nga may kalambigitan sa illegal drugs ug gani naapil kini sa gipanid-an sa kapolisan.
Nakuha sa kapulisan sa crime scene ang 34 ka basiyo sa bala sa M16 nga armas, siyam ka mga basiyo. 9mm ug ang usa ka basiyo sa kalibre .45 nga gituhoang gikan sa armas sa biktima. Nagpadayon pa ang kapulisan sa pag-ila sa mga mamumuno, apan daku ang ilang pagtuo nga isyu kabahin sa drugas ang hinungdan sa krimen. (BANAT NEWS)