2 babayeng pushers, laing tulo nasikop

CEBU, Philippines - Nadakpan sa buy-bust operation sa kapolisan ang duha ka babaye nga gikatahapang pusher og shabu samtang naaktohan sulod sa ilang panimalay nga nagsuyop ang duha ka lalaki ug usa ka babaye nga maoy hinungdan nga lakip usab kini sa gidakop. Ang buy-bust operation nga gipangulohan ni Insp. Antonio Cervantes sa Presinto 5 sa Mandaue City Police Office (MCPO) alas tres sa hapon niadtong Domingo sa Bantayan sa Hari, Looc, sa maong dakbayan.

Si Cervantes miila sa duha ka gikatahapang pusher nga sila si Rosalita Pinote alyas Litang, 47, ug Teresita Basilgo alyas Nene, 43, pulos nagpuyo sa maong dapit.

Laing nadakpan mao sila si Jimmy Villegas, 31, Arestio  Alo, 32, ug Lilibeth Guiwanon, 31, pulos taga Barangay Looc. Nadakpan sila si Pinote ug Basilgo human nakapalit og duha ka paketeng shabu si PO1 Ronnie Padeos nga maoy gihimong police decoy bugti usab sa P400 nga marked money. Dugang nasakmit sa kapolisan ang dugang pang walo ka pakete nga shabu gikan kang Basilgo sa gihimo nilang pagrikisa. Ang tulo nga lakip sa nadakpan ilang nakuhaan og tagsa ka paketeng shabu ug kagamitan sa pagsuyop og shabu. (/GMR) (BANAT NEWS)