CEBU, Philippines - Nasikop sa kapolisan sa gipahigayong buy-bust operation ang managsoon nga gituohang level 3 drug pusher sa dakbayan sa Toledo. Giila ang mga dinakpan nga sila si John Rey Rico alyas Bulantoy, 28, ug James Rico, 33, taga Crossing, Cabitoonan, Toledo.
Nasakmit gikan kang John Rey ang gamay nga pakete sa gituohang shabu, duha ka tag P100 nga buy- bust money, samtang si James nakuhaan sa iyang posisyon og usa ka pakete sa shabu ug drug sniffing paraphernalia.
Sila si Insp. Jovito Labra, PO3 John Ricafort, PO1 Rogelio Gutang Jr. ug PO1 Readan Lara ang nipahigayon sa buy-bust operation sa pagkasikop sa magsoon nga drug pushers.
Matud sa kapolisan nga si Bulantoy ang gipailawom sa watchlist ug gikonsiderar nga level 3 drug pusher nga modispatsar og dili mominus 50 ka gramos sa ginadiling drugas matag semana.
Gitanggong na sa Toledo City detention cell ang mga suspek ug gikatakdang pasakaan og kasong kalapasan sa Republic Act. 9165 o Comprehensive Dangerous Drugs Act of 2002. (/GMR)(BANAT NEWS)