CEBU, Philippines - Gitinguha ni Mandaue City Association of Barangay Council Federation (ABC) President Ernie Manatad nga mahimong tourist attraction ang flyover sa Barangay Subangdaku. Ang international mural artist nga si Amado Guerrero “A. G.†Saño apil sa mga mipinta sa maong flyover.
Si Manatad miingon nga ang unang katuyoan sa pagpamintal sa mga koral nga semento sa ilang kadalanan ug flyover gihimo aron pagsumpo sa vandalism sa mga batan-on ug ang pagmantala og mensahe sa pagpanalipod sa kalikopan Ang mga gipintal ni Saño sagad nagpakita sa nagkadaiyang butang sa kinaiyahan sama sa tubig nga nagdagayday sa sapa, kahoy, langgam, tanom, bulak ug mga butang sa kadagatan sama sa isda, kinhason ug uban pa. Matud pa usa kini ka maayong pagpahinumdom sa katawhan sa kamahinungdanon sa kinaiyahan nga dili angay nga abusohan.
Si Saño nga nahinabi sa Banat News miingon nga ang flyover sa Barangay Subangdaku sa dakbayan sa Mandaue maoy labing unang flyover dinhi sa Pilipinas nga makadani sa pagtan-aw sa molabay nga mga langyaw nga turista tungod sa talagsaong katahom niini.
Dunay kapin sa 100 ka mga batan-on sa dakbayan sa Mandaue nga boluntaryong mitabang sa pagpintal sa tibuok barangay sulod lamang sa bulan sa Mayo niining tuiga. Si Dr. Marilyn Campano nga maoy presidente sa Cebu Kaabag Lions Club miingon nga ang pagpatahom sa barangay Subangdaku ilang gisuportahan ug tinguha nila susamang lakang ang pagahimoon sa 26 ka barangay sa dakbayan sanglit dako ang kahigayonan nga mahimo kining tourist attraction sa dakbayan. (BANAT NEWS)