CEBU, Philippines - Gibutyag ni Mayor Michael Rama nga si Health Secretary Enrique Ona mipasalig nga motabang aron kagahinan og salapi sa nasudnon nga kagamhanan ang pagtukod og bag-ong Cebu City Medical Center.
Hinuon, ang labaw’ng opisyal sa Department of Health (DOH) wala mopasalig kun makahatag ba siya sa gipangayo ni Mayor Rama nga P1 Bilyon aron idugang sa gamay’ng pundo karon sa dakbayan.
Si Rama miadto g’yud sa Manila aron pagpakigkita ni Secretary Ona kay ang dakbayan aduna pa la’y kapin sa P300 milyones nga natigum alang sa pagpatukod og bag-ong CCMC.
Tinguha ni Rama nga napulo ka andana ang bag-ong CCMC building nga tukoron aron makadawat kini og labing minus 1,000 ka pasyente apan mogasto kini og P1.4 Bilyones.
Matud ni Rama nga dili siya mohunong aron ang DOH makagahin gayud og pundo alang sa pagtukod og CCMC nga ikasukip sa DOH Budget para karong sunod tuig.
Ang karaang CCMC building gipaguba ni Mayor Rama kay nakasinati kini og grabe nga pagpangliki diha’ng gitay-og ang Sugbo sa kusog nga linog kaniadtong Oktubre 18. (BANAT NEWS)