Krisis sa PUJ ug bus sa 2016 nalantawan

CEBU, Philippines - Gibati og kabalaka ang  transport group sa Sugbo nga magnihit ang bus ug jeep pasaheroan kun higpitan na sa Land Transportation Franchising and Regulatory Board (LTFRB) ang pagdili na sa pagpadagan sa mga sakyanan nga milungtad na og 15 ka tuig nga gidugayon.

Si Romeo Armamento nga maoy presidente sa Mandaue United Drivers Association-National Transportworker Confederation Alliance (MUDA-NTCA) nagtoo nga adunay krisis sa mga sakyanan nga pasaheroan tungod kay sagad sa tag-iya dili makasugakod pagpalit og bag-ong sakyanan.

Tungod niini, masakripisyo ang pagsakay sa mga pasahero ug posible nga mag-ilogay na hinuon pagkumbayot nga mosangpot sa overloading hinungdan nga ang transport group nanawagan karon sa mga lokal nga kagamhanan paghimo og lakang dili idayon ang lakang sa LTFRB. Giplano sa LTFRB  nga ipatuman ang modernization program sa transport sector sa 2016 apan wala sila mohimo og tugbang nga programa aron matabangan ang sektor sa mga drayber ug operator nga dili  maapektohan ang ilang panginabuhi.

Matud ni Armamento nga wala matan-aw sa kadagkoan sa LTFRB nga  dili lang ang gidugayon sa sakyanan ang hinungdan sa aksidente kun dili lakip na usab ang pagpabaya sa mga  operator.

Giangkon ni Armamento nga daghang operator nga ang sakyanan subra na sa 15  ka tuig apan nindot pa kaayo, apan dunay mga bag-o pa nga gubaon na kaayo.

Si LTFRB-7 Regional Director Ahmed Cuizon miingon nga ang isyu gihisgotan nila sa gipahigayon nga Transport Summit nga gisalmotan sa mga opisyal sa LTFRB, Land Transportation Office (LTO) ug ubang transport sectors sa region  niadtong nakalabay nga adlaw.

Si Cuizon niingon nga padayon nila nga ipatuman ang nahisgutang nga ban sa karaang sakyanan bisan pa man og nakaduso na og petisyon ang kahugpongan sa mga bus operators dinhi sa Sugbo nga nangayo og lugway sa implementasyon.  (BANAT NEWS)