Nanuroy sa parke gipamusil

CEBU, Philippines - Duha ka manag-amigo nga paingon unta magpahayahay sa Eco-Tourism Park sa lungsod sa Argao, gipamusil na hinoon, usa patay.

Giila ang duha nga sila si Ronald Gimena, 40, ug Glenmar Lucero, 39, civilian driver sa kapolisan sa lungsod. Duha sa tulo ka mga suspek ang nailhan na sa kapulisan  nga sila si Par Fernandez,  ug Jun Vie Alboladora ug laing usa ka kauban nga wa dayon maila, ang tulo pulos taga Hampang , Argao.

Sumala pa ni PO3 Benjamin Rosaga sa Argao Police Station nga nahinabi sa Banat News, nga sakay sa motorsiklo ang duha apan sa pag- abot  sa Sitio Hampang kalit silang gipamusil.

Naigo sa paa si Gimena, samtang sa tiil usab naigo si Lucero maong dali silang nakadagan ug nanago kilid sa dalan. Matud pa ni PO3 Rasaga nga gumikan sa kalangay pagdala sa hospital nahutdan og dugo si Gimena. Si Inspector Alejandro Batobalonos, hepe sa Argao Police Station nga nakahinabi sa Banat News miingon nga natumbok nila ang mga suspek human motahan si Ronillo Manayan, 19, ang ikatulong suspek nga wa dayon mailhi. (/EIM)(BANAT NEWS)