50 mil danyos sa sunog miulbo sa Toledo
CEBU, Philippines - Gibana-banang mokabat sa P50 mil ang danyos sa sunog diin naugdaw ang usa ka farm house sa barangay Poog dakbayan sa Toledo kagahapon sa gabii.
Gipanag-iya ni Viviano Labandero, 54, ang maong farmhouse nga daling gilamoy sa kalayo nga ginama sa nipa, cogon ug kawayan.
Matud ni Labandero nga lakip sa nasunog ang iyang binuhi nga mga manok hinuon swerte nga naluwas ang binuhi niini nga kanding. Si SFO2 Julius Dagatan sa Toledo City Fire Department nga nahinabi sa Banat News mibutyag nga ila pang gisusi ang hinungdan sa maong sunog diin gitan-aw karon nga anggulo nga electrical misuse ug ang pasangil nga gituyo kini pagsunog.
Nasayran nga ang biktima adunay kasungian ngadto sa usa sa iyang pag-umangkon apan wala pa mohatag og dugang pamahayag ang biktima kalabot sa maong pasangil. (BANAT NEWS)
- Latest
