Bag-ong CCMC tukoron na sunod buwan

CEBU, Philippines - Ang bag-ong Cebu City Medical Center (CCMC) building sugdan na pagtukod karong Hulyo apan alang ra usa sa lima ka andana aron magamit kini sa tuig 2016.

Napulo ka andana g’yud nga hospital building ang tinguha ni Mayor Michael Rama nga pagatukoron aron makadawat kini og labing minus 1,000 ka pasyente.

Apan sanglit ang 10 ka andana nga CCMC building mogasto man og kapin sa P1.4 Bilyones, nahukman nga unahon lang usa ang pagtukod og lima ka andana.

Dili na usab mahinayon nga ang pagatukoron nga bag-ong CCMC anha itupad sa Bureau of Fire Protection (BFP) building ug nga apil sa magamit ang kabahin sa Panganiban Street.

Atol sa press briefing, ang kadagkoan sa CCMC Management Team nga gipangulohan ni Konsehal Mary Ann delos Santos mibutyag nga ang bag-ong CCMC building pagatukoron sa mao lang gihapon nga dapit nga nahimutangan niini kaniadto.

Ang Panganiban Street dili na dayonon sa pagbalhin kay natan-aw sa management team nga daku kaayo ang magasto kun kini himoon.

Ang dakbayan sa Sugbo aduna pa la’y kapin sa P300 milyones sa pagka karon nga magamit sa pagpatukod og pasiuna nga lima ka andana nga CCMC building. Gilusad sa kagamhanan sa dakbayan sa Sugbo ang “Piso Mo, Ospital Ko” fund drive aron pagtigum og kantidad nga ikadugang pagpatukod sa bag-ong hospital.

Ang karaang CCMC gipaguba ni Mayor Michael Rama kay peligro na kadto nga gamiton tungod sa daghang mga liki nga nasinati pag-igo sa kusog nga linog kaniadtong Oktobre 18.

Ang Cebu City Council miaprobar na sa P300 milyones nga gahin nga magamit sa pasiuna nga pagtukod og bag-o nga CCMC building. (Rene U. Borromeo uban sa report nila ni Lilibeth Ambayec, Charlene Aloyon (BANAT NEWS)