‘Biktima’ mibali pabor sa suspek

CEBU, Philippines - Gihimakak sa ‘biktima’ nga gikuhang testigo sa akusado ang reklamo nga serious illegal detention nga gipasaka sa National Bureau of Investigation NBI-7 sa provincial prosecutors office  batok sa gituohang lider sa kulto sa barangay Buanoy lungsod sa Balamban.

Ang 33-anyos nga babaye, kinsa unang giluwas sa sakop sa NBI dihang gironda ang panimalay sa suspek nga si Casiano Apduhan alyas Tatay Loloy nga giingong lider sa kulto namahayag atubangan sa korte nga dili tinuod nga gitanggong siya niini.

Gireklamo si Apduhan sa ginikanan sa maong babaye nga mitanggong sa ilang anak sulod sa lima ka tuig gikan niadtong Nobiyembre 27,2008  hangtod sa  Marso 26, 2014 sa panimalay niini sa Laray 3 barangay Buanoy, Balamban.

Apan namahayag ang maong 33-anyos nga anak sa mga nagreklamo sa korte nga siya mismo ang nihangyo sa pamilyang Apduhan nga adto mopuyo sa balay niini tungod kay duna siya’y problema sa iyang pamilya ug dako ang iyang pagsalig kang Apduhan nga maoy makatabang kaniya.

Una nang misang-at si Atty.  Danilo Yapa, abogado ni Apduhan , og motion for  judicial determination of probable case sa kasong serious illegal detention sa sala ni Judge Hermes Montero sa Regional Trial Court Branch 59 Toledo City. Samtang si state prosecutor Jasmin Despi andam usab mopresentar og  testigo sa pag-alkontra ug pamatud-ang  gitanggong gyud ni Apduhan ang maong babaye.

Gikatakdang sa adlaw nga Biyernes Mayo 9, 2014 mopresentar og witness ang prosekusyon.

Nasayran nga gawas sa kasong serious illegal detention, gikasohan usab si Apduhan og illegal possession of firearms human nakuhaan og duha ka paltik  .38 rebolber  ug giakusahan pagpatay sa usa ka 15-anyos nga batang lalaki nga si Angelo Repuela kansang kalabira napalgan ilawom sa 30 ka tiil nga tunnel sulod sa panimalay ni Apduhan, apan hugot kining gihimakak sa akusado. (/EIM)(BANAT NEWS)