CEBU, Philippines - Giingong “level 3†drug pusher sa dakbayan sa Lapu-Lapu ang nasikop sa Regional Anti-Illegal Drugs Operation Task Force-7 kagahapon sayo sa buntag sa sityo Hagna, Maribago.
Ang dinakpan nailhan nga si Michael Taghoy, 29, nagpuyo sa maong lugar ug usa ka mananagat apan giila nga level 3 drug dealer nga makabaligya og 25 gramos nga shabu matag semana.
Matud ni SPO4 Dodong Tano sa RAIDSOTF-7, nga atol sa ilang gihimo nga operasyon nakuha nila ang tulo ka medium size nga putos sa shabu ug 10 ka gagmay nga pakete, nga gibanabanang mokantidad sa kapin P60 mil.
Apil nga gisikop si Antonio Pangatongan, uyoan sa suspek nga misulay pa og babag sa mga operatiba ug gipasibat ang suspek.
Matud ni Tano nga ang suspek maoy tig-supply og drugas sa maong lugar. Nasayran sa Banat News nga gikalipay sa mga asawa sa mga mananagat ang pagkasikop sa suspek aron dili matintal ang ilang mga bana nga mopalit og drugas. (BANAT NEWS)