CEBU, Philippines - Tungod sa kainit sa panahon, sunod-sunod na ang pagkabkab sa lapok sa kapin sa gatos ka tuig nga Buhisan Dam aron modako ang kapasidad sa tipiganan sa tubig kun mouwan.
Matud ni Assistant General Manager for Operations Engr. Ernie Delco, adunay kaayohan nga nahatag kini panahon sa ting-init sa ilang operasyon sa maong lugar.
Sumala pa ni Delco, maglisod sila og kabkab kun mag-uwan kay dulhogon ang lugar.
Adunay singkwenta ka trabahante sa operasyon nga nagtinguhang habwaon ang 10, 000 cubic meter nga yuta ug lapok aron mapadak-an ang kapasidad niini og 8,000 ngadto sa 10,000 cubic meters nga tubig kada adlaw.
Matud ni Delco, duha ka buwan nilang trabahoon ang dam tungod kay lisod ang pagpahimutang sa ilang mga ekipo sa maong dapit.
Sa pagkakaron makasuplay lang og 3, 000 cubic meters nga tubig kada adlaw ang Buhisan alang sa 160, 000 nga konsumidor.
“So, when it rains, dako-dako na atong capacity because you are taking out the mud in the field,†matud ni Delco. Ang Buhisan mao lang ang nag-inusarang surface water sa Sugbo nga giingong maoy maapektuhan og maayo kun mahitabo ang El Niño sunod buwan.
Mi-apila ang MCWD sa mga konsumidor nga di mag usik-usik og tubig ug mangandam sa epekto sa huwaw. (BANAT NEWS)