CEBU, Philippines - Ipadali ni Lapu-Lapu City Mayor Paz Radaza ang proyekto sa Department of Public Works and Highways (DPWH) sa Barangay Basak ngadto sa Marigondon aron dili makahasol sa mga motorista.
Matud pa ni Radaza atol sa ilang panagtagbo sa DPWH ug Venrey Construction ang sub contractor niini, gihangyo niya sila nga doblehon ang pagtrabaho sa maong dapit kay usa kini sa dalan nga anaa mag-agi ang tanang matang sa sakyanang pribado ug pangpubliko.
Gikabalak-an ni Radaza ang nagsingabot nga adlaw sa tingklase tungod kay mosamot ang gidaghanon sa sakyanan nga moagi sa maong dapit.
Hinuon ang kontraktor gikatahong mipasalig nga himoon nila ang tanan nga mahuman sa gitakdang panahon ang maong proyekto.
Gisugdan sa tunga nga bahin sa maong upat ka lane nga dalan aron maagian pa kini ug hinayhinay ang matag kilid niini.
Ang City Traffic Management System o CTMS nagbutang og mga sakop pag-abag sa dagan sa trapiko sa mga motorista sa maong dapit.
Bisan sa adlaw nga Domingo adunay mga sakop sa CTMS ang nag-monitor sa maong dalan alang sa hapsay nga dagan sa trapiko.
Matud pa ni Lapu-Lapu City Engineer Engr. Alan Pedrigal ang “road concreting†gikan sa Sitio Tamiya , Basak ngadto sa Marigondon adunay gilay-on nga 1.314 kilometros nga kinahanglang humanon sud sa 210 ka adlaw o mas sayo pa niini. (BANAT NEWS)